حساسية الأنف

حالة متكررة في فصل الشتاء
ابني بيتعب كتير في شهور الشتاء يا دكتور: أدوار برد و كحة و زكام، ايه الحل ؟؟؟
أنا: التعب بيكون أكتر في صورة كحة و رشح و للا سخونة و ألم بالحلق ؟؟
الأم: لا يا دكتور أكتر حاجة الكحة و الرشح.
أنا: الكحة بتكون أكتر في وقت معين من اليوم ؟؟
الأم: أيوة أول ما يقوم من النوم الصبح و لمدة ساعتين
أنا: كحة صوتها مليان إفرازات (بلغم) ؟؟
الأم: أيوة
أنا: الرشح بيستمر كام يوم ؟؟
الأم: علطول مناخيره بايظة يا دكتور و مليانة مخاط
أنا: بيقولك مناخيري بتاكلني و علطول بيدعك فيها ؟؟
الأم: بالظبط يا دكتور
دي كلها أعراض حساسية أنف يا مدام و هي السبب في الكحة و قد تؤدي إلي حساسية صدر إذا لم نهتم بعلاجها..
و هنتأكد بالكشف……….

الأم: و حساسية الأنف دي جاتله منين يا دكتور؟؟
أنا: الحساسية ليها أسباب كتير، منها وراثية و أخري بيئية، و في حالة ابنك عنده حساسية أنف موسمية بتنشط في فصول الخريف و الشتاء نتيجة التقلبات الجوية التي تجعل الهواء محمل بحبوب لقاح و اتربة تحتوي علي مثيرات للجهاز التنفسي
الأم: طيب و صدره يا دكتور، ايه الحل في الكحة
أنا: علاج الكحة هو نفس علاج حساسية الأنف و أول ما الأنف تتحسن الكحة هتتحسن علطول
الأم: أنا اديتله ادوية للبرد و الكحة كذا يوم و مفيش تحسن
أنا: أدوية البرد ليست علاج لحساسية الأنف نهائيا،بل بالعكس ستؤدي إلي زيادة الكحة، أما علاج حساسية الأنف فيتكون من : مضادات الهستامين، بخاخات الأنف، و مضادات الليكوترايين، و يكون اختيار أحد هذه العلاجات أو اكثرمن نوع هو مسؤولية طبيب حساسية الأطفال حسب حالة كل طفل..